del rey lo feriere o lo matar aya tal pena como dixiemos en la ley de los capellanes mayores. E si otro fijo del rey que non fuese de mugier a bendecion lo ferier de qualmanera quier o lo matar, mandamos que aya tal pena como si lo feziese otro rico ome. E si otro ome lo ferier de pie o de mano de guisa que non pierda mienbro, pierda la tierra que del rey tiene, e sea echado del regno e aya el rey de lo suyo quinientos mrs. e el ferido quinientos mrs. E si lo ferier de arma pierda la tierra, e sea echado del regno, e aya el rey de lo suyo dos mili mrs., los mill para si e los mill para el ferido. E si daquella ferida perdiere mienbro, o de ferida quel fiera de pie o de mano, peche dos mill mrs. al rey e dos mill al ferido, e pierda la tierra que tiene del rey, e sea echado del regno. E si lo matare muera por ello. E si nol[1] podiere aver pierda quanto que oviere, e sea del rey segunt el toviere por derecho. E si otro ome lo ferier de mano o de pie de que non pierda mienbro, peche mill mrs. al rey e mill al ferido, e echelo de tierra. E si non oviere de que los pechar pierda la mano. E si de aquella ferida o de otra quel fiera de pie o de mano perdiere mienbro, pierda demas desto la meatad de lo que oviere. E si lo matar, muera por ello e pierda quanto que oviere.
Todos los clérigos de casa del rey deven seer guardados e onrados, e senaladamiente lo deven seer los físicos. Ca pues que ellos son puestos para guardar salut del cuerpo del rey, derecho es que los onre el rey, e todos los de su tierra. E asi como la salut dél por derecho es pro de todos los de su tierra, asi todos deven onrar e guardar aquellos que son puestos para guardarla. Onde qualquier que alguno dellos desonrase que non fuese ferido, mandamos quel peche quinientos sueldos. E si el fijo mayor del rey e de la reyna el que a de seer heredero lo ferier o lo matar, que el rey lo escarmiente segunt fallare por derecho. E otrosi si los fijos del rey e de la reyna lo ferieren de ferida que non pierda miembro, tuelgal el rey la tierra o lo que del tiene.[2] Esi diel ferida de que pierda mienbro, pierda la tierra e echelo el rey del regno e peche dos mill mrs. al rey e dos mill al ferido. E si lo matare pierda quanto que oviere e echelo el
