Página:Las siete partidas del rey Don Alfonso el Sabio (1807).djvu/167

De Wikisource, la biblioteca libre.
Esta página ha sido corregida
95
TIT. V. DE LAS HUESTES.

tierra para fazer y mal, o para cercar villas o castiellos, o alzandose en la tierra algunos para guerrearla. E esto que dixiemos de non seer llamados, podrie seer por alguna destas razones, o por seer el rey muy viejo, nino, o mal enfermo, o muy luene de aquel logar. E por ende dezimos, que todos aquellos que sopiesen, que los enemigos eran en la tierra en alguna destas maneras que dixiemos, los que morasen ciento migeros a deredor de aquel logar ó los enemigos fuesen, que deven venir luego acorrer bien, como si el rey los llamase. E desta hueste non se puede ninguno escusar por privilleio, nin por otra razon ninguna, si non fuese por enfermedat de su cuerpo, o por otro grant enbargo que acaesciese porque non lo pudiese fazer en ninguna manera. E el que asi non veniese acorrer mandamos, que pierda lo que oviere e sea echado del regno, como aquel que non quiso enparar heredamiento de su señor. E como damos pena a los que non acorriesen, asi damos por galardon a los que lo fezieren bien, que todo lo que ganasen sea suyo, asi como dixiemos en la tercera ley deste titulo.

LEY XVII.
Que pena deven aver los que fuyen de la batalla dexando y sus señores.

Si por derecho an pena los que non vienen a las huestes e se tornan dellas asi como dixiemos, quier sea para defender, quier para conquerir, muy mas la deven aver los que fuyen de la batalla dexando y sus señores e los cabdiellos, e este foyr puede seer en alguna destas maneras, ca o fuyen ante que entren en las azes veyendo los enemigos venir, o fuyen seyendo ya las azes paradas, o fuyen siendo la batalla buelta. Onde[1] cada uno destos foyres queremos dezir que pena avera el que lo feziere. E dezimos que aquel que fuye ante que las azes sean paradas, que faze traycion porque dexa su señor veyendo los enemigos venir, e da les esfuerzo[2] porque podrie seer muerto, o preso, o vencido. E por ende el que tal traycion como esta faze, deve seer echado del regno por sienpre. Del que fuye seyendo las azes paradas dezimos, que faze mayor traycion que el otro que dixiemos, ca da mayor esfuerzo a los otros, e enflaquece mas a los suyos, seyendo ya guisado e puesto para en batalla, e demas porque dexó su señor mas cerca de los enemigos,

  1. de cada uno, 2.º cod.
  2. e a los suyos flaqueza porque podrie el señor, 2.º cod.