Moro Rasis: 11

De Wikisource, la biblioteca libre.
10
Crónica del moro Rasis de Ahmad ibn Muhammad al-Razi
Descripción topográfica de España
12

11. Parte el termino de Tudemir con el de Valencia; et Valencia yaze al levante de Tudemir, et al levante de Cordova. Et Valencia ha mui grandes términos et buenas villas que la obedescen, et las bondades de los que en ella moran son muchas. Et Valencia ha en si la bondad de la mar, et de la tierra, et es tierra llana et ha grandes sierras en su termino, et ha otrosi grandes villas fuertes, et castillos et con grandes términos; de los quales es el uno el castillo de Tierra, et el otro es el de Algecira[1]. Et Valencia yaze sobre el rio de Xiquir[2], et en su termino yaze un castillo á que llaman Xatiua. Et Xatiua yaze cerca de la mar, et es mui antigua villa et mui buena. Et el otro es un castillo á que llaman Morviedro, que es logar mui presciado, et mui bueno, et mui fermoso, et mui deleitoso, et fallan en el rastros de población mui antigua. Et en Morviedro ha un palacio fecho sobre la mar por tan gran maestría, que mucho se maravillan las gentes de que lo veen por que arte fué fecho. Et ayuntasse el termino de Morviedro con el de Borriana; et Borriana es tierra muy abondada, et es toda regantía. Et a y muchas naturas de buenas fructas, et de buenas naturas. Et en el termino de Valencia ha tantos castillos que seria gran sçiencia en los contar todos, et otrosí a y tanto azafrán que abondaría á toda Espania, et dende lo lievan los mercadores á todas las partes del mundo. Et de Cordova á Valencia ha doscientos y dos migeros.



  1. Alcira
  2. Xucar, Júcar