Moro Rasis: 26
26. Parte el termino de Aguadalfaxar con el termino de Toledo. El Toledo yaze contra Poniente del cabo postrimero, et contra Septentrión de Cordoua. Et Toledo fué siempre cámara de los reyes; et todos la escogieron por mejor, et sennaladamente para su morada; porque era en todas las cosas mui bien fecha á su voluntad. Et fué una de las quatro cibdades que Ercoles pobló en Espania. Después siempre los Cesares la tuvieron por cámara. Et Toledo yaze sobre el rio de Tajo; et en Tajo ovo una puente rrica et marauillosa; et atanto fué sotilmente labrada que nunca omen pudo asmar con verdat que otra tan buena avia fecha en toda Espanya; et fué fecha quando reynaua Mafomat Elimen, et esto fué quando andava la era de los moros en doscientos et quarenta annos. Et quando entraron los moros á Toledo, tomaron la mesa de Salomón, fijo del rrei David, et teníanla los christianos. Toledo es mui buena cibdat, et mui grande, et de mui grant plazer, et mui fuerte, et mui amparada; maguer la cercaron grandes poderes, siempre se tovo mui bien, et mui prouechosa para sus moradores. Et siempre fué de buena mantenencia, et mui abondada en los annos fuertes. Et siempre vienen á ella de todas partes, et ha y la mejor tierra de panes, tanta por tanta que en toda tierra de Espanya sea. Et es tierra de buenos aires, et el pan dura y mucho, et non pudre nin se danna, et pueden y tener el trigo diez annos, que non sea mui dannado: et por esso se tenia mucho quando la guerreauan. Et el su azafrán es mejor que todo lo de Espanya, en tinta et en olor. Et Toledo fué la mayor cibdat de termino que ovo en Espanya et de la que mas fablavan. Et Toledo ha muchas villas et muchos castillos mui fuertes, de los quales es el uno el que llaman Talavera, et ficieronla los antiguos Griegos sobre el rrio de Tajo, et fué después amparamiento de los moros et de los christianos, al tiempo que cada unos la tovieron por sí. Et el muro de Talavera es mui fuerte, et mui alto, et de mui altas torres, et quando andaua la era de los moros en doscientos et veinte et cinco annos, mandó Aimiramamolin, fijo de Mafomat, que fisiesen un departimiento entre los de la villa et los de fuera, et que fisiesen un alcaçar en que morassen los Almoxarifes[1]. Et pues que la cibdat de Talavera fué poblada, siempre fué defendida por su buena obra. Et la otra es la cibdat de Calatrava , et yaze contra Meridien de Toledo, entre Oriente et Septentrión de Cordoua, et yaze sobre el rrio de Guadiana; et yaze otrosi en buena tierra de sementera de pan, et mui temperada; et es tierra de mui buena caça, et dan y los ganados mucha leche, et mas que en otra tierra. Et es tierra mui dolentia para los omens. Et la otra cibdat es aquella á que llaman Consuegra, et es mui buena tierra et mui sana, et mui ahondada de todas las cosas que son menester para la vida de los omens. Et ha en en su tierra mui buen venero de plata. Et Consuegra yaze al Meridien de Toledo, et al Septentrión de Cordoua, et yaze á quarenta migeros de Toledo, et á ochenta migeros de Cordoua. Et otrosi el castillo que llaman Orsa[2], et yaze al Leuante et Septentrión de Cordoua. Et otrosi un castillo á que llaman Taracol, et Taracol es mui buen termino de pan et de cazas, et de mui buenas montannas et tierra mui sana.