Moro Rasis: 32
32. Parte el termino de Santaren con el de Coimbra. Et la cibdat de Coimbra es mui fuerte, et es castillo mui alto et mui noble; et yaze sobre el rrio que ha nombre Mudel; et este rrio nasçe en la sierra del Estrella, et yaze sobre muchos castillos et mui buenos et mui fuertes, que obedesçen á Coimbra. Et este rrio entra en la mar á veinte et qualro migeros de Coimbra, et es rrio de muchos pescados, et de muchas naturas. Et la cibdat de Coimbra es mui buena et mui abondada de todos los bienes, et ha una vega de sementera ribera del rrio, que non ha tan buena en toda Espanya, que regantía non sea. Et quando el rrio sale de madre, cúbrela toda, et después que se torna, fazen su sementera, en manera que han tanto pan que han cumplimiento para todo el anyo, et para otro que serán dos, maguer la vega ha en luengo quinze migeros et en ancho quatro. Et la cibdat de Coimbra es mui viciosa et de muchas huertas et de muchos frutales de muchas guisas, et los mas son olivares, et dan el mejor azeite que ha en el mundo. Et la cibdat de Coimbra es mui antiguo logar. Et de Coimbra á Santaren ha setenta migeros.