Moro Rasis: 36
36. Parte el termino de Sevilla con el de Carmona: et Carmona yaze al sol Levante de Sevilla, et al Poniente de Cordoua. Et Carmona es mui antigua villa et fué poblada de antiguo, et es muy fermossa et mui fuerte, et muí bien labrado el su muro; et es mui falaguera de buenas tierras et siempre fué defendida, fasta que se alzó Abderrahamen; entonce vino sobre ella Almiramamolin et destroyóla por fuerza de fuego. Después fué tan fuerte como antes, que fasta en aquel tiempo nunca vinieron tantos sobre ella que los pudiessen enpesçer. Et el su termino es de los buenos que ha en toda Espanya, que todas las cosas que en él echan, todas van á bien, et crecen mas ayna que en otros lugares. Et en su termino ha villas et castillos, de los quales es el uno Marchena que es mui buena villa et mui poblada de gente, et la otra es la villa que llaman Bardis, et la otra es Tanbubara. Et al otro llaman Canillas, et de Canillas á Cordoua ha sessenta migeros; et á Sevilla veinte et cinco migeros. Et Carmona yaze sobre azerrife que se comienza en la su huerta de Narbona. Et de Carmona á Narbona ha mil migeros. Et quien saliese de Carmona, et fuere á Narbona, nunca saldrá de arrecife, sinon quissiere. Et este arrezife mandó fazer Ercoles, quando fiço fazer los concilios.