Moro Rasis: 40
40. Parte el termino de Algezirat-Aladra con el termino de Raya, et Raya[1] yaze al Septentrión de Algezirat-Aladra, et al sol Lebante de Cordova. Et Raya es una buena villa, et el su termino es bien conplido de buenas fuentes, et de rrios que llevan mui grandes aguas, et es tierra mui umeda de natura. Et a y mui grandes llanos et de mui buenas sementeras, et de muchas plantas de vinnas, et de arboles de muchas naturas: et aderredor de los llanos ha montes mui fuertes. Et la cibdat de Raya fué fecha mui bien et mui fermosa. Et es villa mui antigua et es mui buena tierra de crianzas. Et en su termino ha villas, et castillos, de los quales es uno Laraduia, que es su cámara; et el otro es Malaga, que es una villa mui antigua, et yaze sobre la mar; et ha mui nobles términos et sementeras de plantas et de vinnas, et de arboles de muchas naturas. Et fazen y la mijor pasa que ha en todo el mundo, et la que se mas mantiene; et es villa mui plasentera et mui fermosa, ella et su termino. Et mantienense y muchas gentes et mui buenas. Et la otra ha nombre Cártama et la otra es Tamilla[2], et Tamilla yaze cerca la mar, et la otra es Almaria[3] que yaze ribera de la mar. Et el otro castillo es Bubestar. Et Bubestar es un castillo mui fuerte et mui defendido et otro castillo que llaman Elys et et otro que llaman Bovera et otro que llaman Jamares otro que llaman Varón et otro á que llaman Ibro, et otro á que llaman Montemayor et es mas fuerte castillo et mas alto que todos los otros del termino de Raya. Et del comenzaron á guerrear á Espanya. Et el otro es un castillo á que llaman Zoel[4], et es atalaya sobre el mar que yaze en tal lugar que non puede por la mar venir cosa grande nin pequenna para Espanya que del non la vean.