Moro Rasis: 8
8. Parte el termino de Cabra con el de Elibera, et Elibera yace contra meridien et levante de Cordova, et la su tierra es mui abondada de mui buenas guas, et de rios, et de arboles mui espesos; et los mas son naranjales et avellanos et granados dulces, et maduran mas ayna que las que son agras; et ha y muchas cannas de las que facen el azúcar, et a y venero de oro, et de plata, et de plomo, et de cobre, et de fierro. Et en su termino a y un logar que llaman Salombina[1], et a y el venero del atutia, al que agora llaman argent bivo. Et el termino de Elibera es complido de muchas bondades, et a y un monte que llaman Xulair, et tanto quiere decir Xulair[2] como monte de la Elada, porque en todo el año nunca se parte ende la elada; et la nieve en tanto que se ende tolle alguna cosa, luego viene otra, porque es quebrada. Et quando van á este monte en tiempo de verano, fallan y sabrosos logares et buenos para folgar, et muchas fuentes de buenas aguas, et muchas espeçias que meten en las melecinas. Et en su termino ha villas que le obedescen, de las quales es una Cazalla, que en el mundo ha quien la semeje si non Damasco, que es tan buena como ella. Et en su termino ha pedreras de marmoles mui buenas et mui blancas, et non mui fuertes, et facen ende muchas ollas, et aiudanse del en muchas cosas, et de muchas guisas, et facen del mui fermossas imagenes. Et el otro es el casillo de Granada, al que llaman villa de los judíos, et esta es la mas antigua villa que en termino de Elvira ha, et pobláronla los judíos. Et por medio de la villa de Granada va un rio que avia nombre Salom et agora es llamado Guadaxenil; et nasçe de un monte que ha en termino de Elbira que ha nombre Dayna[3]. Et en este rio cojen las alimaduras del oro fino, et entra en el rio que sale del monte de la Elada. Et el otro castillo ha nombre Lora, et Lora yace contra el Poniente de Elibera et contra meridien de Cordova. Et Lora es muy natural sierra de muy buenos logares, et de mui buenas fructas et huertas, et yace sobre le rio de Xenil; et el otro es el castillo de Pliego ha y mui buenas sementeras, et muchos arboles et muchas fuentes; et la su agua ha una virtud mui extranna, que se quaxa en piedras á tiempos. Et el otro es Almeria, et yaçe al levante del sol, et es llave de ganancia et de todo bien, et es morada de los sutiles maestros de galeas, et façen y muchos pannos de seda con oro et mui nobles; et el su castillo yaze sobre la mar. Et el otro castillo es Berja. Et el otro castillo es Sibilis. Et el otro castillo es Soloma, et yace sobre un rio que ha y tantos cominos que abondaría á toda Espanna; et a y muchos montes et mui altos; et a y muchos rios, de los quales es el uno el que ha nombre Yegen, el que viene sobre la cabeça de Elibera, et sobre la tierra de Granada. Et el otro castillo es Malaga, en el qual vino primero la cavalgadura que fiço Abdurahamen, el fijo de Moavia, á quien Dios perdone. Et quando el entró primeramente en este castillo, andava la era de los moros en ciento et treinta ocho annos, en el mes de Rabé, á que llaman los christianos Enero. Et quando el entró andava la era de los christianos que dicen de César en sieteçientos et sessenta et tres annos[4]. Et Malaga yaze sobre la mar, et es mejor de frutas que quantas ha en el mundo, et de buenas passas et de buena seda, et de muchas cannas de azúcar, et de yervas, et de pan. Et otrosí el su termino es honrrado, et del sale el mejor sirgo de todo el mundo, et dende lo lievan á todas partes de Espania. Et otrosí el mejor lino que ha en todo el mundo, et mas presçiado entre las mugeres. Et en todo el anno non y mengua fructa. Et de Cordova a Elibera a setenta migeros et de Pliego á Cordova a sesenta migeros.