de aquella fortaleza. E si el castiello non se perdiere, este que lo a de recebir deve pechar quantas costas e quantas mesiones feziere despues del plazo el quel tiene en retenerle fasta que lo reciba. Otrosi dezimos que si el que a de recebir castiello o fortaleza de los que se dan e se reciben por portero nol fuere recebir al plazo quel puso el rey quel recebiese, deve pechar al que lo tiene antes quantas costas e quantas misiones feziere en recebirlo despues del plazo fasta quel reciba. Enpero si este que tiene el castiello o la fortaleza lo avie enplazado al rey e el rey manda alguno que lo vaya recebir e le da portero quel entregue del, e le apercibe como es enplazado si nol fuere recebir al plazo e el castiello se pierde, es alevoso e deve aver pena de alevoso. E maguer que en esta ley dixiemos que aquel que es vasallo o natural del rey non puede ganar castiello nin fortaleza que al rey su señor non lo aya adar por derecho, esto non se deve entender sinon[1] aquellos que lo ganan por furto o por fuerza en guerra. Mas aquellos que lo an por heredamiento o por testamento bien lo pueden aver cunpliendo al rey sus derechos dende asi como lo avien a conplir aquellos a qui fue dado el donadio. Pero ai alguno siendo vasallo del rey conprase o camiase algun castiello o alguna fortaleza porque podiese fazer mal al rey o al regno, tal conpra nin tal camio non deve valer nin lo deve el consentir.
Avemos ya mostrado en estas leyes de suso como deven dar las villas e los castiellos e las fortalezas los que las reciben del rey o las ganan por si. E agora queremos dezir como las deven enplazar quando las quisieren dexar. E dezimos que todo ome que villa o castiello o fortaleza toviere del rey, por desamor quel aya nin por saña non gela deve enplazar en tal tienpo que su rey sea en hueste o en tierra de sus enemigos á peligro de si, o que aya de aver batalla con otro rey o con otro ome poderoso, o que aya grant alevantamiento en su tierra porque non lo pueda recebir sin peligro o siendo mal enfermo o mal ferido por que non fuese bien en su acuerdo. E mas quando enplazar lo quisiere, desta guisa lo deve facer, quando el
- ↑ f. de aquellos.
