De la onra e de la guarda del merino mayor, e de la justicia de casa del rey, avernos mostrado en el dezeno titulo del segundo libro. Agora queremos dezir, como deven seer guardados e onrados los alguaziles, o juezes, o justicias que son puestos por las cibdades e por las villas. E otrosi los merinos menores, que son puestos por mano de los mayores por las merindades. E dezimos, que qualquier que alguno destos sobredichos desonrare o feriere, quel deve pechar quinientos mrs. por onra del rey, e por razon del lugar que tienen, e esto sin caloña de la desonra, o de la ferida quel pecharie, sinon toviese aquel lugar. E qui matare alguno dellos, muera por ello, fueras ende si lo matare defendiéndose, queriendol el otro ferir a el o matar sin derecho. E si rico ome lo matare, pierda la meatad de lo que oviere, e sea echado del regno. Otrosi dezimos, que si alguno feriere o desonrare al que dexa en su lugar la justicia de casa del rey, o el alguazil, o el juez, o la justicia de la cibdat o de la villa, que deve pechar la meatad que pecharie si lo feziese al que dexó en su lugar, e qui lo matare, muera por ello, fueras ende si lo matare rico ome, que non deve pechar mas de la meatad que pecharie si lo feziese a aquel que dexó en su logar. E demas aun dezimos, que si alguno matare o feriere alguno de los peones del merino mayor, o de la justicia de casa del rey, que deve aver tal pena como si lo feziese alguno de los merinos de casa del rey, segunt dize en la postrimera ley del dezeno titulo del segundo libro. Mas qui feriere o matare alguno de los sayones, que son puestos para enplazar, e prender, e asentar, e para entregar quando gelo mandaren los alcalles, o aquellos que an poder de judgar, o de los peones que andan con aquellos que an de fazer la justicia en las cibdades e en las villas o en las merindades, que peche dos tanto de lo que pecharie, si gelo feziese ante que fuese puesto en aquel lugar.
