Los sayones e los peones de todos estos sobredichos, que deven ayudar a fazer la justicia, tan bien a los que la an de judgar, asi como dixiemos en el primer titulo deste libro, como a los que la an a conprir por obra de que fablamos en este titulo segundo[1], deven seer apercebidos para guardar todas estas cosas que manda esta ley. Primeramiente deven guardar, que non pasen a mas de quanto les mandaren, nin otrosi que non dexen de conprir aquello que les fuere mandado, segunt las cosas que ellos an de fazer por el logar que tienen. E deven guardar, que quando los enbiaren a fazer entregas, o prender, o recabdar omes, o fazer otra cosa en razon de justicia, que cunplan de fecho lo que les fuere mandado, mas que non denuesten, nin maltrayan a ninguno. Ca la justicia non se puede fazer por denuestos, nin por escatimas, mas con cordura e firmemiente. E otrosi, deven guardar que non tomen de ninguno mas de lo que ovieren de aver con derecho, por razon de sus soldadas segunt mandan las leyes. E si mas tomaren, pechenlo doblado a aquellos de qui lo tomaren. E qualquier dellos que non guardase todas estas cosas sobredichas en esta ley, sin la pena que deve aver por derecho por lo que fezíere o dixíer de mas de lo quel fue mandado , mandamos que aquel cuyo fuere, que lo eche de aquel logar que tiene desonradamiente.
Bien semeia cosa guisada, que pues que mostrado avernos que es lo que deven guardar los merinos mayores e la justicia de la corte del rey, e los alguaziles, e las justicias o juezes de las cibdades e de las villas, e los otros que les ayudan a conplir la justicia, asi como dixiemos en las leys ante desta, que digamos otrosi, que es lo que deven fazer estos mismos. E dezimos, que quando el rey fiziere el merino mayor, e oviere tomado la jura del, la primera cosa que deve fazer el merino es, que desafie todos los fijosdalgo del
- ↑ Debe decir, tercero.
