e asentar. E quando alguna destas cosas ovieren a fazer, deven levar consigo testigos que vean lo que fezieren, porque sea cierto lo que fezieren, e non pueda seer negado, e non puedan dezir que fezieron mas de lo que les mandaron[1].
Queriendo nos mostrar mas conplidamiente todas las cosas que pertenescen a justicia, fablamos primero de aquellos que la an de fazer por juyzio. E despues dixiemos de los otros que la an de fazer por obra. Mas porque esto non lo pueden fazer a menos de aver razon para venir a ella, asi como por las demandanzas e las querellas que an los omes los unos contra los otros, por ende nos queremos dezir e mostrar primeramiente de los demandadores que fazen estas demandas e estas querellas, que es lo que deven fazer ante que la querella o la demanda fagan. Otrosi, quando la fezieren, por que non cayan en yerro por sus demandanzas, nin ayan a fazer despensas de balde, nin recebir otros daños que les podrie venir por este lugar. Onde dezimos, que por non caer en este yerro deve guardar el demandador estas seys cosas. La primera, que es lo que demanda. La segunda, a qui lo demanda. La tercera, quanto es lo que demanda. La quarta, en que tienpo lo demanda. La quinta, ante quien lo demanda. La sesta, que demanda para aver derecho, e non a mala parte para fazer daño al otro a qui demanda. E de cada una destas mostraremos como se deven entender.
El demandador deve catar que es lo que demanda, asi como dixiemos en esta otra ley, primeramiente si demanda rayz o mueble, o si demanda emienda de tuerto o de daño quel ayan fecho en su cuerpo, o en sus cosas vivas o non vivas, o a otri porque lo deva él demandar. E si demanda rayz, deve nonbrar la cosa qual es, e en que lugar, e do es, e senaladamiente los linderos, o al
- ↑ Aqui con la iii ley, lib. v., tit. i deste lib.
