la una en las personas de los omes que son meester para ellos de que avernos ya dicho, e la otra de los fechos dellos, de que avemos mostrado alguna partida, asi como enplazamientos, e asentamientos, e defensiones. Mas agora queremos aqui dezir de uno de los mas senalados fechos, que an meester en los pleitos. E esto es de las demandanzas, e de las respuestas porque se comienzan los pleitos. E como quier que en el titulo de los demandadores mostramos que deven catar para fazer sus demandas, enpero porque non dixiemos y como se comienza el pleito por respuesta, queremoslo aqui dezir e mostrar como deven fazer las demandas, e quien deve responder a ellas, e como para seer el pleito comenzado. E que preguntas pueden fazer los judgadores, o los contendores, ante del pleito comenzado o despues. E que cosas les avienen ende a amas las partes por seer el pleito comenzado. E si muchas demandanzas acaescieren en un pleito, qual dellas deve ser oyda primero.
Demandanza de las cosas es en dos maneras. Ca la una se faze en razon del señorio de aquella cosa misma que demandan, e la otra en razon de la tenencia della. E cada una destas se departe en mochas guisas, segunt que dize en el titulo que demuestra de como se gana el señorio e tenencia de las cosas. E para fazer demanda en qualquier destas maneras, deve ser nonbrado el judgador, e el demandador, e el demandado, e la cosa que demanda. E si es rayz, devela sinalar, asi como dize en la segunda ley del titulo de los demandadores. E desque asi ovier el demandador nonbrado estas cosas, e cuntado todo el fecho, si el pleito fuere antel rey, o ante otro su señor, devel pedir merced quel faga dar aquela heredat con los fructos que ende recebio aquel que la tenie, nonbrando el tienpo de un año, o de dos, o de mas si los ovier, en que la deviera aver por derecho. E si el pleito fuere ante otro judgador, devel rogar quel faga conprir estas cosas, asi como es sobredicho. E si la demanda fuere de mueble, deve demandar la cosa, e demandar que parezca si fuer tal que se pueda mostrar. E si non se podier mostrar, deve dezir porque razon la demanda, segunt dize en la V ley del titulo sobredicho, e pedir que gelo faga dar. E si fuere llavor que deviera fazer fasta dia senalado, é non la fizo, puede pedir la pena que puso de pechar si ia non feziese, o puede demandar el menoscabo quel vino porque non fue fecha, e nonbrar la valia de quanto puede ser aquel menoscabo.
