Página:Poema del Cid - Antonio de Sancha - 1779.djvu/319

239

Si vos asi lo ficieredes è la ventura me fuere complida,
Mando al vuestro altar buenas donas è ricas:
225 Estó yo en debdo que faga y cantar mill Misas.
Spidios' el Caboso de cuer è de voluntad:
Sueltan las riendas è piensan de aguijar.
Dixo Martin Antolinez: veré à la mugier à todo mio solaz:
Castigarlos he como avran à far.
230 Si el Rey me lo quisiere tomar, à mi non minchal:
Ante seré convusco que el Sol quiera rayar,
Tornabas Martin Antolinez à Burgos, è mio Cid aguijar,
Pora San Pero de Cardena quanto pudo à espolear
Con estos Caballeros quel' sirven à so sabor.
235 Apriessa cantan los Gallos è quieren quebrar albores,
Quando legó à San Pero el buen Campeador,
El Abbat Don Sancho Christiano del Criador,
Rezaba los Matynes à buelta de los albores.
Y estaba Doña Ximena con cinco Duenas de pro
240 Rogando à San Pero è al Criador:
Tu que à todos guias val à mio Cid el Campeador.
Lamaba à la puerta, y sopieron el mandado.
Dios que alegre fue el Abbat Don Sancho
Con lumbres è con candelas al corral dieron salto:

Con