Esta página ha sido corregida
18
Líricos castellanos.
Non sabedes tanto descanto,
eya velar:
Que salgades de so el canto,
eya velar.
Todos son ladronçiellos,
eya velar:
Que assechan por los pestiellos,
eya velar.
Vuestra lengua tan palabrera,
eya velar:
Ha vos dado mala carrera,
eya velar.
Todos son omnes plegadizos,
eya velar.
Rioaduchos mescladizos,
eya velar.
Vuestra lengua sin recabdo,
eya velar:
Por mal cabo vos ha echado,
eya velar.
Non sabedes tanto de enganno,
eya velar:
Que salgades ende este anno,
eya velar.
Non sabedes tanta razon,
eya velar:
Que salgades de la prision,
eya velar.
Tomaseio e Matheo,
eya velar:
De furtarlo han grant deseo,
eya velar.
El discipulo lo vendió,
eya velar:
El Maestro non lo entendió,
eya velar.
