manda, non deve pechar las despensas, e aquel que a de judgar el pleito non deve otrosi por eso dexar de dar juyzio sobre quanto provare el demandador. Otrosi dezimos, que si alguno demandase a otro alguna cosa ante del dia senalado en que gela devie a dar, o ante que la postura se conpliese que pusieron asi con el, como dixiemos en esta otra ley, desque provadol fuere, dezimos, que aquel quel oviere a judgar, deve saber quanto tienpo fincava fasta el plazo, e desque lo sopiere, deve dar otro tanto de tienpo a que pague el demandado aquello que deve, despues de aquel plazo señalado a que lo avie a dar. E quando fuere conplido aquel tienpo, non deve responder el demandado fasta quel peche el demandador las despensas que fizo, demandandol ante del plazo[1]. Tenemos por bien otrosi, que si alguno demandare a su debdor lo quel devie en otro logar ó non gelo prometiera de dar, si tal demandanza le feziere antel alcalle, de cuya alcallia es el demandado, que aquel alcalle pueda judgar tal pleito como este. Enpero pechar deve el demandador quanto menoscabo recebio el demandado, por razon de la paga que fizo en otro logar ó non prometiera de pagarle.
El tienpo dezimos otrosi, que deve catar el demandador quando su demanda quisiere fazer, que non sea en las fiestas que dize en el titulo de las ferias en que non deven judgar, nin otrosi en los tienpos que son para coger el pan e el vino, segunt que en este mismo titulo dize. Ca si en tales días fezíese su demanda, ningun juyzio que sobrello fuese dado non valdrie, maguer amas las partes fuesen avenidas. E esto dezimos de los dias senalados de las fiestas. Otrosi, el día del viernes en que manda en aquel titulo sobredicho, que non fuese dado juyzio de muerte nin de lision[2]. Mas de los otros tienpos que son para coger el pan e el vino dezimos, que si amas las partes se avenieren para entrar en pleito, tanbien el demandador como el defendedor, el juyzio que les fuere dado deve valer, seyendo dado derechamíente, como mandan las leyes.
