terle en aquella pena, que dize en la dezena ley del titulo, que es ante deste. Ca en esta pena que dicho avemos caerie el demandador, fueras ende si la demanda que feziese non fuese fecha señaladamiente a mala parte[1]. Mas si demandase a sabiendas mas de lo que el otro avie a dar, e el demandado le pudiese vencer mostrando, que el otro su contendor a mala parte lo demandava, deve perder el demandador tan bien lo que devie el demandado, como lo quel demandava mas[2].
En la dozena ley del titulo ante deste mostramos de como el demandador deve guardar en que tienpo faze su demanda, e mostramos y por que razones lo deve fazer. Mas agora queremos mostrar por esta ley, como el demandado deve catar otrosi en que tienpo le demandan, por esta razon. Ca maguer que en aquella onzena ley sobre dicha dixiemos, que el juyzio que fuese dado en los dias de las fiestas non valdrie en ninguna manera, nin él que fuese dado en el tiempo de las ferias, que es para cojer el pan e el vino, non valdrie sinon con consentimiento de amas las partes, con todo aquesto dezimos, que el demandado apercebido deve seer que si judgarlo quisiere en estos dias sobredichos, o en las ferias, que lo contradiga, e que muestre que non deve seer. E si asi non lo feziere, e si callare, e juyzio fuere dado sobre aquello quel demandaren, deve valer aquel juyzio bien como si amas las partes fuesen avenidas para entrar en pleito.
Mostrar queremos en esta ley, ante quien deve el demandado responder quandol demandaren. E dezimos, que si non quisiere el demandado, non deve responder en juyzio ante otro alcalle sinon ante aquel que es puesto para judgar la tierra ó él mora, fueras ende en aquellas cosas que dixiemos en las leyes del primero titulo deste libro. E otrosi, en las que pertenecen a juyzio de santa egle-
